उम्र के धूप चढ़ल

उम्र के धूप चढ़ल,   धूप  सहाते   नइखे
हमरा हमराही के  इ बात  बुझाते नइखे

मंजिले इश्क में कइसन इ मुकाम आइल बा
हाय ! हमरा से “आई.लव.यू” कहाते नइखे

देह अइसन बा कि ई आँख फिसल जाताटे
रूप अइसन बा कि दरपन में समाते नइखे

जब से देखलें हईँ  हम सोनपरी  के जादू
मन बा खरगोश भइल  जोश अड़ाते नइखे

कइसे सँपरेला  अकेले  उहां प  तहरा  से
आह! उफनत बा नदी, बान्ह बन्हाते नइखे

साथ में तोहरा जे देखलें रहीं सपना ओकर
याद आवत बा बहुत  याद ऊ जाते नइखे

हमरा डर बा कहीं पागल ना हो जाए ‘भावुक’
दर्द उमड़त बा  मगर आँख  लोराते नइखे